Leyla ilə Məcnun (televiziya serialı)

Leyla ilə Məcnun, 2011–2023-cü illər arasında yayımlanmış, absurd komediya və dramatik elementləri birləşdirən Türk televiziya serialıdır. Əvvəlcə TRT 1 kanalında yayımlanmağa başlayan serial, sonrakı illərdə Exxen adlı rəqəmsal platformada davam etdirilmişdir. Serialın ssenarisi Burak Aksak tərəfindən yazılmış, rejissoru isə Onur Ünlüdür.

^{Leyla ilə Məcnun serialından bir səhnə}

Hadisələr eyni gün, eyni xəstəxanada dünyaya gələn Leyla və Məcnunun beşik kertməsi olunması ilə başlayır. İllər sonra yolları yenidən kəsişən bu iki gəncin hekayəsi zamanla absurd və fantastik məhəbbət nağılına çevrilir. Məcnun ailəsindən Leyla ilə beşik kertməsi olduğunu öyrəndikdən sonra könülsüz şəkildə onu istəməyə gedir, lakin Leylanı görən kimi ona aşiq olur. Bu eşqin ardınca gedərkən Məcnunun yuxularına “Ağsaqqallı Dədə” daxil olur və yalnız yuxularda deyil, real həyatda da ona bələdçilik etməyə başlayır.

Serial klassik məhəbbət hekayələrini alt-üst edən bir formatda təqdim olunur. Absurd yumor, dramatik səhnələr, fəlsəfi istinadlar və zaman-zaman qırılan dördüncü divar vasitəsilə gerçəkliklə fantaziya arasında dəyişən bir narrativ struktura malikdir. Bu özəllikləri ilə Türkiyə televiziya tarixində seçilən və az rast gəlinən bir iş kimi dəyərləndirilir. Yerli mədəniyyətə əsaslansa da, geniş bir auditoriyaya xitab edə bilmişdir.

^{Leyla ilə Məcnun serialından bir səhnə}

Başlıca aktyor və aktrisalar:

• Ali Atay (Məcnun)
• Ezgi Asaroğlu (ilk Leyla)
• Serkan Keskin (İsmayıl Abi)
• Osman Sonant (Yavuz)
• Ahmet Mümtaz Taylan (İskəndər Baba)
• Köksal Engür (Ağsaqqallı Dədə)
• Cengiz Bozkurt (Bakkal Erdal)

• Yayım müddəti: Hər bölüm təqribən 70–90 dəqiqə
• Bölüm sayı: 144
• Mövsüm sayı: 3 mövsüm TRT-də, davam bölümləri Exxen platformasında
• Janr: Komediya, Dram, Fantastik, Romantik
• İstehsalçı şirkətlər: Eflatun Film, Paradox Film
• Yayım tarixləri: 9 fevral 2011 – 2023
• Çəkiliş məkanı: Kireçburnu, Sarıyer, İstanbul

^{Leyla ilə Məcnun serialından bir səhnə}

Leyla ilə Məcnun geniş tamaşaçı kütləsinin rəğbətini qazanmış, IMDb saytında 9.1 kimi yüksək bir reytinq əldə etmişdir. Fərqli obrazları, orijinal ssenarisi və unudulmaz dialoqları ilə Türk televiziya tarixində kult statusuna çatmışdır. Yumorun yanında duyğusal səhnələri ilə də dərin təsir buraxan serial, bir çox izləyici tərəfindən dəfələrlə izlənmiş və sosial platformalarda geniş şəkildə müzakirə olunmuşdur.

Serialdakı “Dosto” obrazının ssenarist Burak Aksakın alter eqosu olduğu bildirilir. Bundan əlavə, Mehmet Erdemin ifa etdiyi musiqilər də böyük maraq görmüş və populyar mədəniyyətdə önəmli yer tutmuşdur.